tuldok

by cha
082206


bakit hindi tumitigil ang pagtibok
pagtibok ng puso para sa iyo
bakit hindi tumitila ang mga luha
luhang daig ang buhos ng bagyo
marahil dahil may pag-asa pa
pag-asa na sana ay dumating
dumating na sana ang panahon
panahon na ako'y iibigin mo rin
ngunit mga luha ngayo'y mas mapait
mas mapait kumpara sa dati
ang kakarampot mong atensyon
atensyon na ngayon ay pinagdadamot
unti-unti, ikaw ay lumalayo
lumalayo hanggang di na maabot
maabot ka sana kahit sa isang sulyap
sulyap sa iyo, mapansin mo kaya?
kailan mapapagod ang aking puso
puso kong namimilipit sa sakit
sakit na dulot ng kawalan
kawalan ng linaw sa hinaharap
marahil kusa rin ito mapapagod
mapapagod din sa pagtibok, may wakas
wakas ng luha sa aking mga mata
mata na nakasaksi sa lahat ng pighati
kailan nga ba titigil ang kabaliwan
kabaliwan na tinatawag nilang pag-ibig
pag-ibig na walang dinulot kundi sakit
sakit na sana ay matuldukan.
matuldukan kailan? hindi ko alam


wala sa akin ang sagot.

kuno

by cha
081606

paano mo nagawa ito?
ikaw na kagalang-galang,
pagkapita-pitagan. mga bulag
na mata'y laging nagkakandarapa
sa iyong mga utos dahil ikaw
ikaw ay disente at matino. isang
katangian na sa ating lipunan
ay salat.

bakit ka nagkaganyan?
ikaw na tinitingalang mambabatas
naninindigan sa batas ng lipunan
at sa kalangitan. laging humahanay
sa kung ano ang tama. katarungan
sa mga api at pagal.

anu ba ang nangyayari sa'yo?
ikaw na nagsilbing ehemplo
sa iyong mga anak. mga kamay
na humubog sa haligi ng
kanilang pagkatao. ngayon,
mga kamay na pumipiga ng
luha sa kanilang mata.

bakit ka ganyan?
lahat ng tikas at talino
mo, lahat ito pawang mga
kuno, peke, walang kwenta,
walang saysay. dahil hindi
ka pala tunay na lalake
gaya ng inisip ko

nakakatawa isipin
nahulog kami sa iyong alindog
nakakaiyak isipin
ikaw ang tatay ko